NOTES

My Hart is jou Gebed

Van Thula af tot nou, tot hier by My hart is jou gebed, was ‘n lang pad. Ek het teerpad, stofpad en soms gruispadgestap. Ek het myself met tye op vreemde weë bevind, afdraaipaaie gevat en soms in die wildernis van die lewe verdwaal. Ek het baie gelag en ek het baie gehuil. Soms was die son verblindend skerp in my oë en soms het dit my dae verwarm. Partykeer het my nagte koud, donker en te lank gevoel, maar soms was die koelte van die nag vertroostend.

Alhoewel ek jare terug met die dood van my seun gesweer het ek sal nooit weer kan sing nie – het my soeke na die groot vrede nooit opgedroog nie. 
Skuins voor my vyftigste lewensjaar het ek op my voete kom land op ‘n stukkie ‘heiligegrond’ tussen perde en donkies, tussen die ryk grond en die blou hemel. Die note in my kop het weer helder geword en ek het onthou dat ek ‘n stem het. Ek het onthou dat my wyse Pa my vertel het van Logos en Mithos en dat daar twee bronne van verstaan is. Kennis van die verstand ... en Kennis van die hart.

En so het die eelte van my hart afgeval en kon ek die Gees weer ervaar. Met onbeskryflike dankbaarheid en ‘n stille vrede kon ek weer skryf, kon ek weer sing. Dit is dan met hierdie ware ‘stukkie-verhaal’ waarmee ek MY HART IS JOU GEBED vir julle bring.

Elke lied op hierdie album is ‘n stukkie van my hart, ‘n stukkie van my verhaal. Ek hoop dat elkeen wat hierdie album luister ‘n klein stukkie van hulle hart ook hier tussen die note sal kan vind en sal weet dat KENNIS VAN DIE HART werklik saak en sin maak